21 лютага ва ўсім свеце адзначаецца Міжнародны дзень роднай мовы. Адзначаецца гэты дзень з 2000 года. Сёння ў свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна родная мова.
Вось аб гэтым і ішла гаворка на мерапрыемстве “Не пакідайце ж мовы роднай”, якое падрыхтавалі і правялі вучні 10 класа нашай установы адукацыі для навучэнцаў 5-6 класаў.
Гучалі вершы пра родную беларускую мову , прыгожыя беларускія песні, вучні адгадвалі загадкі-жарты, вядучыя пазнаёмілі ўдзельнікаў мерапрыемства з запаведзямі Віктара Шведа аб мове:
- Мову родну беражы.
- Мовай роднай даражы.
- Мову родную шануй.
- Мовай роднай не гандлюй.
- Мову родную любі.
- Мовы роднай не кідай.
- Мову дзецям перадай.
- Мову не аддай на здзек.
- Толькі з ёю жыцця век.
Удзельнікі мерапрыемства пазнаёміліся таксама з выказваннямі вядомых беларускіх паэтаў і пісьменнікаў аб роднай мове.
Мэта мерапрыемства была дасягнута: пяці- і шасцікласнікі атрымалі цікавую інфармацыю, якая пакінула ў іх добрае ўражанне і заставіла задумацца аб той вялікай ролі роднай мовы, якую яна мае ў жыцці кожнага чалавека.
Вучні пачатковых класаў прынялі ўдзел у мерапрыемстве “Пагуляем у роднае слова” (настаўнік - Церахава В.С.). Заданні былі прапанаваны на любы густ і ўзровень. Дзеці з вялікім жаданнем чыталі і размаўлялі на беларускай мове, слухалі песні і вершы ў выкананні мастакоў слова.
Што не кажыце, а калі на роднай мове размаўляюць дзеці, гучыць гэта з асаблівай асалодай!